حجز تذاكر قصر البارون

الواي فاي وصل له أكبر أبديت من... 20 سنة!!!! :O

انهاردة هيئة الاتصالات الفيدرالية عملت تصويتة على فتح نطاق جديد من ترددات موجات اللاسلكية وهو نطاق الـ 6 جيجاهيرتز، بجانب النطاقين الموجودين حاليا بالفعل وهم نطاق الـ 2.4 جيجاهيرتز والـ5 جيجاهيرتزن وده هيعمل طفرة كبيرة من الانترنت، فهتبقى سرعة الانترنت أعلى بكتير جدًا مهما كان عدد الاجهزة الواصلين بشبكات الواي فاي في مساحة ضيقة!

الجيل الجديد من الواي ده اسمه WiFi 6E!

يلا كدا البوست خلص.. شكرا!

- كابتن..
بسسسسست..
ولاااااا.. انا مفهمتش حاجة!!

= والله عندك حق!! :D

أبسطهاااااالك! :D

راوتر بيتكو التقليدي جدا الحلو الأبيض ده حاليا بيوصلك إشارات الواي فاي من خلال نطاقين من الترددات وهم 2.4 جيجاهيرتز و5 جيجاهيرتز، ودول الاتنين يادوب بالكتير بيقدروا يوفرولك عدد محدود جدا من القنوات المتاحة لنقل بيانات الاتصال بالانترنت بين الراوتر والاجهزة الواصلة بيه، وكل ما زاد عدد الراوترات والاجهزة الواصلة في مكان واحد، كل ما حصل على القنوات اللي متاحة دي وبالتالي كل ما كان اتصالك بالانترنت أبطأ بكتيييييييييييير!

تخيل بقى مع كل الزنقة دي، آجي وأديلك مجوعة قنوات في نطاق جديد خالص اللي هو الـ 6 جيجاهيرتز، بسعة أوسع أصلا كمان لكل قناة، وبالتالي كم الداتا اللي هيتنقل بين الأجهزة والراوترات الموجودة في مكان واحد هيحصل بشكل سهل وسريع جدا وبدون ما يحصل أي ضغط ع القنوات دي ولا حد يعطل كونكشن الباقي بالانترنت!

أحب أقولك إن الـ 6 جيجاهيرتز هتضرب المساحة المتاحة حاليا لنقل الداتا بشبكات الواي فاي في  أربعة!!!

ازاي نجرب الواي فاي الجديد ده؟!

بص بقى ركز وفتح مخك معايا،
الجيل الجديد WiFi 6E مش أبديت بتعمله داونلود من الانترنت ولا أبلكيشن بتداونلوده ويجيبلك الميزة دي على موبايلك، فأبوس ايديك متدورش على الحوارات دي ولا تقع في الفخ اللطيف ده..

الـ WiFi 6E ده تقنية بتبقى موجودة على الأجهزة اللي فيها شريحة إلكترونية معينة بتقدم الميزة دي، والميزة دي هتبقى تتوفر على الأجهزة الجديدة من راوترات وأجهزة منزلية وموبايلات ولابتوبات وغيرها بداية من آخر السنة دي..

وحاجة مهمة كمان،
عشان تستفيد بالـ WiFi 6E لازم أول حاجة تشتريها فيها التقنية دي هي الراوتر لان ده أساس الموضوع كلو، لإن لو الراوتر مبيدعمش التقنية دي وكل أجهزتك في البيت بتدعمها، ملهاش لزمة نهائي، لإن الراوتر هو اللي بيحدد أنهي نطاق بظبط هيستخدمه في ارسال واستقبال إشارات الواي فاي مع أجهزتك، فلو راوترك قديم وكل أجهزتك شغالة WiFi 6E، هتلقط عليها واي فاي طبعا بس العادي اللي هو WiFi 5 أو أقدم!