حجز تذاكر قصر البارون

طبعا عارف مثلث برمودا صح؟..

طيب عندنا في مصر هنا موقع بحري معروف جدا عبارة عن مثلث زي مثلث برمودا كدة لكنه اهم واشهر من مثلث برمودا كونه موقع مهم للغطس عالميا اسمه "مثلث ابو نحاس" وهو على بعد ٣٥ كم غرب جزيرة شدوان قدام الغردقة.

مثلث ابو نحاس هو واحد من اشهر واكثر الاماكن اللي غرقت فيه السفن لدرجة تسمية المثلث بالنحس، حيث ان القاع بتاعه عبارة عن حطام سفن بس على مر التاريخ، وعدد لا يحصى من الحطام متنطورة هنا وهناك، الا ان الحطام المعروفة والمتسجلة اللي اجمع عليها العلماء هي لسبع سفن ضخمة غرقوا في المكان ده، وكان سبب الغرق على مر التاريخ غامض لدرجة صياغة قصص شعبية عن جن يجذب السفن الى القاع، لكن في النهاية تم الاجماع على ان السبب هي الشعاب المرجانية الغير مرئية بالعين المجردة على ممرات السفن دي في البحر الاحمر واللي بتؤدي الى تسريب المياة الى السفن ثم غرقها.

اشهر السفن الغارقة في المنطقة دي : 

١- إس إس كارنتيك البريطانية سنة ١٨٩٦م : كانت في طريقها الى الهند وكانت محملة بالبضايع من نحاس ودهب وقطن وخمور، لما بدأت تغرق كان القبطان رافض ان الركاب ينزلوا على جزيرة شدوان لحد ما مات ٣١ من الركاب، وقدر سكان المنطقة انهم يغوصوا وينقذوا ما قيمته ٤٠ الف جنية استرليني من البضايع وهي اشهر واقدم حطام معروف هناك.

٢- سيستل الجورم البريطانية ١٩٤١م : هي سفينة عتاد بريطانية عسكرية كانت رايحة ناحية شمال افريقيا ايام الحرب العالمية التانية ومحملة سلاح ومعدات حربية، قدر الطيران الالماني انه يقصفها من الجو وتسبب في غرقها في الموقع ده، تتميز السفينة دي انها كانت بطول ١٣٠ متر وان حمولتها موجودة تحت المية لحد دلوقتي من سلاح وعربيات جيب ولبس عسكري بريطاني وموتوسيكلات حربية ودبابات وخلافه.

٣- كريسولاك اليونانية ١٩٧٨م : كانت سفينة شحن محملة بلاط واحجار وغرقت بعد اصطدامها بالشعب المرجانية.

٤- كيمون إم الالمانية سنة ١٩٧٨م : بعد شهرين من غرق سفينة كريسولاك اليونانية غرقت السفينة دي بنفس الشكل في نفس المكان، تشتهر ان سطحها قريب من المية ب٦ متر فا اي حد ممكن يغوص جمبها

٥- تشريسولا كيه اليونانية ١٩٨١م : كانت سفينة شحن متجهة لجدة في السعودية ومحملة بالسيراميك، فقد الكابتن سيطرته عالسفينة فا غرقت بالبضاعة اللي عليها كلها، ولسة البضاعة بتاعتها في السفينة في مكانها

٦- جيانيس دى اليابانية ١٩٨٣م : كانت سفينة شحن جاية من كرواتيا ورايحة السعودية وعليها حمولة اخشاب، القبطان خلى واحد من الظباط بتوعه يمسك الدفة في المية المفتوحة فا الظابط معرفش يتحكم فيها وانجرفت السفينة للغرب بسرعة كبيرة فا غرقت.

٧- سفينة اولدن الالمانية ١٩٨٧م : غرقت بنفس طريقة السفينة اللي قبليها.

بالاضافة لعدد من المواقع المجاورة لمثلث النحس او ابو نحاس اشهرهم موقع سفينة الفحم الفرنسية روزلي مولر واللي كانت بطول ١٠٨ متر وتاني اضخم سفينة بعد السفينة البريطانية وهي من السفن السريعة، كانت مهمتها نقل الفحم من افريقيا لجبل طارق، استهدفها الطيران الالماني سنة ١٩٤١م وغرقت جمب الموقع شمال الغردقة، بالاضافة ل٢٣ موقع تاني لسفن غارقة تانية منها منطقة حطام الغردقة اللي فيها كاسحة الالغام السوفييتية اللي غرقت ايام حرب ١٩٧٣م ، وجنوب جزيرة الاخوين غرقت سفينة نوميديا الضخمة سنة ١٩٠١م.

سمعت عن مثلث ابو نحاس؟ والنحس اللي بيسببه للسفن اللي بتعدي منه؟ مظنش