وضع مطروح الآن:
- البلد تعتبر فاضية وبنسبة اشغال حوالي ١٠٪.
- جميع الشواطئ العامة مغلقة من ٩ صباحاً حتى ٦:٣٠ مساءاً ففي حوالي ٣ ساعات تقدر تنزل فيهم البحر الصبح او ساعة ونص بالليل وده طبعا جدعنه من الشرطة هنا المفترض حظر كامل على الشواطئ العامة.
- جميع شواطئ فنادق القوات المسلحة مفتوحة ومسموح الدخول للمدنيين سعر احد الفنادق على كورنيش مطروح فندق السلام ١٠٠ جنيه للعائلة.
- جميع الشواطئ الخاصة مفتوحة زي روميل والابيض بلو بيتش.
- الشواطئ البعيده العامة مفتوحة ومش عليها حراسة زي الأبيض العام او بلو بيتش او زمرده او العام ٢ ودول اجمل شواطئ مطروح فعلاً. وفي كمان الرميلة ومينا حشيش.
- عجيبة فيها صيانة وتجديدات لكنها شغالة ومفتوحة للزوار عادي.
- حمام كليوباترا فيه صيانة وتجديدات ومغلق حتى يوم ٢٠/٧ بالأضافة انه اتغير تماماً للافضل طبعا بس هيبقى بتذاكر للدخول.
- عدد قليل من المطاعم الفرانشيز زي بيتزا وتكا فتحت .
- مطاعم البلد كلها مفتوحة زي كمنه وكوكو العربي.
- المحلات بتقفل ٩ لان الحظر ١٠ ماعدا محلات الأكل.
- سوق ليبيا مفتوح و شغال لحد ٩.
- شاطئ الابيض بلو بيتش سعر الشمسية و٢كرسي ٥٠ جنيه والأبيض زمرده ١٠٠ جنيه.
- شاطئ الغرام للأسف مغلق تماماً.
لو انت اول مره تروح مطروح:
- السوبر جيت ب١٥٠ والقطر ب٨٠ جنيه درجه تانية.
- بالعربيه هتاخد طريق اسكندرية الصحراوي وبعدين طريق العلمين ثم طريق الساحل الشمالي لحد مطروح.
- اسعار الشقق في متوسط ٢٠٠٠ جنيه الاسبوع.
- اشتري لب من عند نصر اللي بشارع العوام وهو محلين قدام شوية جنب بعض وهو ده احسنهم لان في ٥٠٠٠ نصر بمطروح.
- اشتري حاجة السوبر ماركت من فتح الله اللي على البحر.
- قرى سياحية الأندلسية وبورتو مطروح بس حاليا شبه مقفولين لان مفيش نسبة اشغالات.
- زور حمام كليوباترا.
- عجيبه ثم عجيبه ثم عجيبه بس.
- زور سوق ليبيا عشان تشتري توابل او زيتون وفي حاجات تانية برضه.
- شارع اسكندرية للتسوق وهو يعتبر وسط البلد بمطروح.
- دوق البطيخ المطروحي والعنب المطروحي حاجه تانية خالص.
- مطروح مشهورة بالتوابل والزيتون وزيت الزيتون.
- اشتري سمك جاهز من شارع اسكندرية او انزل عند الميناء الساعه ١٠ الصبح هتلاقي السمك بنص السعر.
- احسن وانضف شاطئ هو الابيض بلو بيتش والعام التاني مش اول واحد. وكل شواطئ الابيض حكاية.
- كمنه من افضل محلات المشاوي في مصر بس لو الدنيا زحمه اوعى تغامر.
- صبحي العطار في شارع اسكندرية مشهور بالتوابل.
- كوكو العربي بيقدم اكل عربي ومطروحي حلو.
تعليقات
إرسال تعليق