قانون الشهر العقاري وتعليماته واضح تماما باختصار شديد
منشور رقم ٦ في ٢٠٢١ /٢٢/٢ وزاره العدل
١_س/ايه الجديد في المادة ٣٥ مكرر اللي قالبه الدنيا دي؟
ج/قبل المادة ٣٥ مكرر لما كنت ترفع دعوي صحة ونفاذ أو دعوى تثبيت ملكية أو دعوى شفعة او اي دعوى متعلقة بحقوق عينية عقارية والقاضي يحكم بصحة ونفاذ العقد مثلا كان لابد من الرجوع للشهر العقارى لشهر هذا الحكم.. المشكلة أنك لما كنت بترجع الشهر العقارى كانت المامورية بتبحث الملكية مرة أخرى وكان بيترتب على ذلك أن كتير من الأحكام لا تشهر لوجود مشكلة في الملكية وبالتالي تهدر حجية كثير من الأحكام
الجديد انك بعد ما تاخد الحكم وترجع الشهر العقارى تشهر الحكم لن يتم بحث الملكية وبالتالي المادة المضافة حديثا حلت اشكاليه بحث الملكية ف الأحكام فقط لاغير.
٢_س /طب ليه الضجه اللي معموله دي؟
ج / بسبب حظر القانون على شركات المرافق التعامل مع أصحاب الشقق الا اذا كان معهم عقد مشهر.
٣_س/طب كده اللي معاه حكم صحة توقيع ينفع يشهره؟
ج/ لا
٤_س/طب لو انا شاري شقة في عقار مش مسجل اصلا هل ليا علاقة بالقانون ده؟
ج/ لا
ولكن أمامك طريق واحد لو أردت التسجيل وهو رفع دعوى تثبيت ملكية (وضع يد).
٥_س/طب انا شاري شقة من فترة و داخلها كل المرافق هل في مشكلة بالنسبة ليا كده؟
ج/ لا المشكلة للي ها يشتري منك مش ها يعرف ينقل عدادات المرافق باسمه
٦_س/ طب لو انا شاري شقة داخلها المرافق وعايز انقل العدادات باسمي ممكن اعمل ايه؟
ج /مفيش حاجه ممكن تعملها للأسف لو مقدرتش ترفع دعوي عينية عقارية لشهرها وبالتالي تستمر ملكية العدادات فقط باسم من اشتريت منه.
٧_س/طب لو انا شاري شقة في عقار مش مسجله شهر عقاري ومالهاش سند ملكية اعمل ايه عشان اسجل ف الشهر العقارى؟
ج/مش قدامك الا رفع دعوى تثبيت ملكية (وضع يد ) بس ده بشرط يكون مضى مده على عقد البيع بتاعك أو عقد بيع اللي انت شاري منه أكثر من ١٥ سنة.
٨_س/طب لو انا شاري شقة في مدينة جديدة تابعة لهيئة المجتمعات العمرانية نفس الكلام؟
ج /لا الوضع هنا مختلف تماما لأن قانون إنشاء شهر عقاري بالمجتمعات العمرانية الجديدة رقم ٢٧ لسنة ٢٠١٨ سهل إجراءات شهر الشقق والأراضي ف المدن الجديدة فمن الأفضل عدم اللجوء للمادة ٣٥ مكرر الا اذا كان في مشاكل بينك وبين البايع وهو رافض يجي يصدق على المشهر ومش معاك توكيل منه بالبيع للنفس أو الغير انما لو مفيش مشاكل يبقى من الافضل عدم اللجوء للمادة ٣٥ مكرر لطول الاجراءات والتكلفة العاليه.
٩_س/طب لو انا عايز اشتري شقة مش مسجله ومش عايز انقل العدادات باسمي ممكن اعمل ايه يحفظ حقي؟
ج/ ممكن ترفع دعوي صحة توقيع على العقد زي ما هو حاليا وممكن تعمل توكيل من البايع لك وفي الحالتين معاك اثبات لصحة العقد من حيث التوقيعات ولكن لن تستطيع نقل العدادات باسمك.
١٠_س/طب التكلفة كام للتسجيل طبقا للمادة ٣٥ مكرر؟
اعتقد انها لن تقل بأي حال من الأحوال عن ٥٠٠٠ جنيه وقد تصل ل ٥٠٠٠٠ في عقود معينه أو أكثر ذلك احيانا .
اخيرا التسجيل طبقا للمادة ٣٥ مكرر بعيد عن نقل العدادات مهم جدا جدا جدا لمن يريد الحصول على ضمانه قانونية أقوى من أي ضمانه أخرى فمن يستطيع التسجيل طبقا لهذه المادة فلا يلجأ لأي طريق آخر مثل دعوى صحة التوقيع التي لا تعتبر ضمانه الا من ناحية توقيع أطرافها فقط.
تعليقات
إرسال تعليق