حجز تذاكر قصر البارون

 

الوهم نصف الداء

هيفضل أكبر عدو للإنسان هو الوهم !!

توهم نفسك إنك على حق وإنت على باطل ..

توهم نفسك إنك عامل إللي عليك و إنت مش عامل ..

توهم نفسك إنك ماشي صح وإنت ماشي غلط ..

توهم نفسك إنك ضحيه .. وأنت السجان ..

 توهم نفسك إنك غلط مع إنك صح ..

وتوهم نفسك إنك مش قادر و إنت قادر ..

توهم نفسك إنك صابر وإنت مش صابر ..

توهم نفسك إنك بتحب و إنت مش بتحب ..

توهم نفسك هتموت من غيره و تلاقي نفسك عايش ..

وأكبر وهم .. إنك توهم نفسك إنك عارف ربنا وإنت متعرفهوش !

الوهم هي النفس الآماره بالسوء .. هو قدره عقليه على إحلال وتبديل الصور في ذهن الإنسان  .. هو قدره على طمس الفطره والبصيره .. هو قدره على تصديق أي حاجه متتصدقش .. والقدره على فرض حاجه مش موجوده .. هو اكبر مفتاح للخوف .. للقلق .. لكل وجع ..

( أَفَمَنْ زُيِّنَ لَهُ سُوءُ عَمَلِهِ فَرَآهُ حَسَنًا )

علشان كده متستغربش لما تلاقي الظالم والمظلوم بيدعوا على بعض !

الوهم يخلي القاتل يقتل و هو شايف إنه بطل !

والحرامي يسرق وهو شايف إن ده حق !

الوهم علاجه الوحيد ( العلم والمعرفه ) تتعرف على الحقيقه .. على أصل القانون .. قوانين ربنا .. من غير تزيين ولا تزييف ولا هوى .. ومتتعرفش عليه من دماغك لأن مش كل القوانين هتفهمها لوحدك ولا تضمن تجنب الهوى في فهمك .. 

(فَاسْأَلُواْ أَهْلَ الذِّكْرِ إِن كُنتُمْ لاَ تَعْلَمُونَ )

بس خلي بالك وإنت بتسأل .. متصيغش السؤال بأهواءك علشان توجِّه الإجابه لهواك !

شفت ؟!

شفت النفس ممكن توصلك لإيه ؟

كله بالوهم !!!

لكن ..

مهم اوي  تتقبل إنك هتقابل ناس في حياتك عايشين على الوهم .. ومش عايزين يعرفوا لا حقيقه ولا قانون و مستمتعيين بتزيينهم لأعمالهم !

 دول ربنا قالك تتعامل معاهم إزاي في باقي الإيه :

( فَإِنَّ اللَّهَ يُضِلُّ مَنْ يَشَاءُ وَيَهْدِي مَنْ يَشَاءُ فَلَا تَذْهَبْ نَفْسُكَ عَلَيْهِمْ حَسَرَاتٍ إِنَّ اللَّهَ عَلِيمٌ بِمَا يَصْنَعُونَ )

متتحسرش .. الهدايه من عند ربنا وهو أعلم يستحقوها ولا لأ .. 

عليم بما يصنعون ..

الآيه دي فيها الخلاصه ..  

( أَفَرَأَيْتَ مَنِ اتَّخَذَ إِلَٰهَهُ هَوَاهُ وَأَضَلَّهُ اللَّهُ عَلَىٰ عِلْمٍ وَخَتَمَ عَلَىٰ سَمْعِهِ وَقَلْبِهِ وَجَعَلَ عَلَىٰ بَصَرِهِ غِشَاوَةً فَمَن يَهْدِيهِ مِن بَعْدِ اللَّهِ ۚ أَفَلَا تَذَكَّرُونَ )

لازم  تتأكد إنت مين إلهك ؟!

 إذا كان إلهك هواك .. فإلحق .. لإن الوهم متعته وقتيه .. و الدنيا أقصر بكتير من إنك تضيعها في وهم .. ولا بترتاح دنيا ولا أخرى !